ஹீரோ மோட்டோகார்ப் வெளியிட்டுள்ள இந்தியாவின் 250சிசி சந்தையில் மிக வேகமான எக்ஸ்ட்ரீம் 250ஆர் பைக்கின் விலை ரூபாய் 1,79,900 முதல் துவங்குகின்றது. 0-60 கிமீ வேகத்தை வெறும் 3.25 வினாடிகளில் எட்டிவிடும் என்பதனால் போட்டியாளர்களை விட மிக வேகமான நேக்டூ ஸ்டைல் ஸ்போர்ட்டிவ் பைக் என ஹீரோ நிறுவனம் குறிப்பிடுகின்றது.
குறிப்பாக இந்திய சந்தையில் கிடைக்கின்ற பல்சர் என்250, கேடிஎம் 250 டியூக், சுசூகி ஜிக்ஸர் 250 உட்பட பல்வேறு மாடல்களை எதிர்கொள்ளுகின்ற எக்ஸ்ட்ரீம் 250 ஆர் பைக்கிற்கான ஹீரோவின் பிரீமியா டீலர்கள் மூலம் முன்பதிவு பிப்ரவரி மாதம் துவங்கப்பட்டு டெலிவரி மார்ச் 2025 முதல் மேற்கொள்ளப்பட உள்ளது.
Hero Xtreme 250R
ஏற்கனவே ஹீரோ விற்பனை செய்து வருகின்ற ஹீரோ கரீஸ்மா XMR 210 பைக்கிலிருந்து பெறப்பட்ட 210சிசி எஞ்சின் முற்றிலும் மாற்றியமைக்கப்பட்டு ஸ்ட்ரோக் 7mm வரை அதிகரிக்கப்பட்டு 249.03cc லிக்யூடு கூல்டு DOHC 4 வால்வுகள் பெற்ற எஞ்சின் தற்பொழுது 30 PS பவர் ஆனது 9250 rpm-ல் வெளிப்படுத்துவதுடன் 7250 rpm-ல் 25Nm டார்க் வெளிப்படுத்துகின்றது. அசிஸ்ட் மற்றும் சிலிப் கிளட்ச் உடன் கூடிய 6 வேக கியர்பாக்ஸ் கொண்டுள்ளது.
முதன்முறையாக வெளிப்புற சூழ்நிலைக்கு ஏற்ப ஒளிரும் வகையிலான எல்இடி ஹெட்லைட் கொண்டுள்ள இந்த பைக்கில் டூயல் சேனல் ஏபிஎஸ் உடன் கூடிய இரண்டு மோடுகளை (Road & Sports) பெற்று பின்புற வீல் லிஃப்ட் ஆஃப் பாதுகாப்புடன் முன்புறத்தில் 320 மிமீ டிஸ்க் மற்றும் பின்புறத்தில் 230 மிமீ டிஸ்க் கொண்டுள்ளது. இரு பக்க டயரிலும் 17 அங்குல வீல் வழங்கப்பட்டு ட்யூப்லெஸ் டயருடன் முன்புறம் 110/70-17 M/C 54H மற்றும் பின்புறத்தில் 150/60-17 M/C 66W டயரினை பெற்றுள்ளது.
ஸ்டீல் டெர்லிஸ் ஃபிரேம் கொண்ட எக்ஸ்ட்ரீம் 250R பைக் மாடலில் முன்புறத்தில் 43 மிமீ அப்சைடு டவுன் ஃபோர்க் மற்றும் ப்ரீலோட் அட்ஜஸ்ட் செய்யக்கூடிய மோனோஷாக் கொண்டுள்ளது. கருப்பு, சிவப்பு மற்றும் ஷூட்டிங் ஸ்டார் என மூன்று விதமான நிறங்களை பெற்று எல்சிடி கிளஸ்ட்டரை கொண்டு 35க்கு மேற்பட்ட பல்வேறு கனெக்ட்டிவிட்டி சார்ந்த ஹீரோ கனெக்ட் வசதிகளை பெற இசிம் கார்டு ஆதரவு வழங்கப்பட்டுள்ளது.
167.7 கிலோ எடை கொண்டுள்ள பைக்கின் வீல்பேஸ் 1357 மிமீ பெற்று 167 மிமீ கிரவுண்ட் கிளியரண்ஸ் கொண்டு இருக்கையின் உயரம் 807 மிமீ ஆக உள்ளது.
மிக வேகமான பைக் மாடலாக விளங்குகின்ற எக்ஸ்ட்ரீம் 250 ஆர் அடிப்படையிலான ஃபேரிங் ஸ்டைல் கரீஸ்மா எக்ஸ்எம்ஆர் 250 அடுத்த சில மாதங்களுக்குள் சந்தைக்கு வரவுள்ளது.
