மாருதி சுஸுகி நிறுவனத்தின், அடுத்த எம்பிவி ரக மாடலாக புதிய மாருதி சுஸுகி XL6 மாடல் ஆகஸ்ட் 21 ஆம் தேதி வெளியிடப்பட உள்ள நிலையில் இந்த காருக்கான முன்பதிவு அதிகாரப்பூர்வமாக தொடங்கப்பட்டு முன்பதிவுக்கு ரூபாய் 11 ஆயிரம் கட்டணமாக வசூலிக்கப்படுகின்றது.
எர்டிகா எம்பிவி ரக மாடலை விட கூடுதலான பிரீமியம் வசதிகளை பெற்று 6 இருக்கை கொண்ட மாடலாக வெளிவரவுள்ள எக்ஸ்எல் 6 காரின் நீளம் எர்டிகாவை விட 50 மிமீ அதிகரிக்கப்பட்டிருந்தாலும் வீல்பேஸ் அதிகரிக்கப்படவில்லை.
மாருதியின் நெக்ஸா ஷோரூம்களில் விற்பனைக்கு வெளியிடப்பட உள்ள ஆல்பா மற்றும் ஜெட்டா என இரு வேரியண்டுகளை பெற்றதாகவும், மூன்று வரிசை இருக்கை பெற உள்ள எக்ஸ்எல் 6 காரில் இரண்டு கேப்டன் இருக்கைகளை இரண்டாவது மற்றும் மூன்றாவது வரிசைகளில் கொண்டிருக்கும். சாதாரண எர்டிகா காரை விட மிகவும் ஸ்டைலிஷான மற்றும் முரட்டு தன்மையை வெளிப்படுத்தும் வகையில் அமைந்திருக்க உள்ள XL6 காரில் மிக நேர்த்தியான எல்இடி ஹெட்லேம்ப், எல்இடி பகல் நேர ரன்னிங் விளக்குகள், பாடி கிளாடிங் உள்ளிட்ட வசதிகள் சேர்க்கப்படுவதனால் காரின் தோற்றம் கவனத்தைப் பெறுகின்றது.
கருமை முக்கியத்துவம் கொடுக்கப்பட்ட இன்டிரியரில் மாருதியின் ஸ்மார்ட் பிளே ஸ்டூடியோ இன்ஃபோடெயின்மென்ட் சிஸ்டம் கொண்டிருப்பதுடன், ஆண்ட்ராய்டு ஆட்டோ மற்றும் ஆப்பிள் கார் பிளே உள்ளிட்ட வசதிகளை கொண்டதாக அமைந்திருக்கும். கூடுதலாக இந்த காரில் ரிவர்ஸ் பார்க்கிங் கேமரா, லெதர் இருக்கைகள், மற்றும் க்ரூஸ் கண்ட்ரோல் போன்றவற்றை பெற்றிருக்கும்.
மாருதியின் XL6 காரில் பிஎஸ் 6 மாசு உமிழ்வுக்கு இணையான 1.5 லிட்டர் ஸ்மார்ட் ஹைபிரிட் SHVS பெட்ரோல் என்ஜின் பொருத்தப்பட்டு 4 வேக டார்க் கன்வெர்ட்டர் ஆட்டோமேட்டிக் மற்றும் 5 மேனுவல் கியர்பாக்ஸ் ஆப்ஷனில் கிடைக்க உள்ளது.
