AX1 குறியீட்டு பெயரில் தயாரிக்கப்பட்டு வருகின்ற மைக்ரோ எஸ்யூவி மாடல் வருகை குறித்தான முதல் டீசர் படத்தை ஹூண்டாய் நிறுவனம் வெளியிட்டுள்ளது. விற்பனையில் உள்ள வென்யூ எஸ்யூவி காருக்கு கீழாக நிலைநிறுத்தப்பட உள்ளது.

சர்வதேச அளவில் பல்வேறு நாடுகளில் இந்த ஆண்டின் இறுதியில் வெளியிடப்பட உள்ள ஏஎக்ஸ்1 எஸ்யூவி காரின் இந்திய அறிமுகம் 2022 ஆம் ஆண்டின் துவக்க மாதங்களில் எதிர்பார்க்கப்படுகின்றது. தென் கொரியாவில் சோதனை ஓட்டத்தில் ஈடுபடுத்தப்பட்டு வரும் இந்த மாடல் மிக சிறப்பான எஸ்யூவி அனுபவத்தை பட்ஜெட் விலையில் வழங்கும் வகையில் தயாரிக்கப்பட்டு வருகின்றது.

வெளியிடப்பட்டுள்ள டீசரில் ஹெட்லைட் மற்றும் டெயில் லைட் படங்கள் வெளியான நிலையில், எல்இடி டி.ஆர்.எல் உடன் கூடிய வட்ட வடிவ ஹெட்லைட் உடன் வழக்கமான ஹூண்டாய் கிரில் இணைக்கப்பட்டுள்ளது.

கிராண்ட் ஐ10 நியோஸ் காரில் இடம் பெற்றிருக்கின்ற 1.1 லிட்டர் மற்றும் 1.2 லிட்டர் பெட்ரோல் இன்ஜின் பொருத்தப்பட்டு மேனுவல் கியர்பாக்ஸ் உடன் ஏஎம்டி ஆகியவற்றை கொண்டிருக்கும்.

இந்திய சந்தையில் விற்பனைக்கு கிடைத்து வருகின்ற மஹிந்திரா கேயூவி100, மாருதி இக்னிஸ், மற்றும் வரவிருக்கும் டாடா ஹெச்பிஎக்ஸ் எஸ்யூவி ஆகியவற்றை எதிர்கொள்ள உள்ளது.