ஃபோர்ஸ் மோட்டார்ஸ் நிறுவனம் தனது புதிய அர்பேனியா டீலக்ஸ் (Urbania Deluxe) வேனை விற்பனைக்கு ரூ. 28.70 லட்சம் எக்ஸ்ஷோரூம் விலையில் மெர்சிடிஸ்-பென்ஸ் என்ஜினுடன் அறிமுகப்படுத்தியுள்ளது.
முந்தைய அர்பேனியா மாடலுக்கு மாற்றாக வந்துள்ள இந்த புதிய ‘டீலக்ஸ்’ பதிப்பு, அதிக பவர் கொண்ட இன்ஜின், உயர்தர கேபின் வசதிகள் மற்றும் கூடுதலான பாதுகாப்பு அம்சங்களுடன் சுற்றுலா அமைப்பாளர்கள், ஹோட்டல் டிரான்ஸ்ஃபர், கார்ப்பரேட் நிறுவன ஊழியர்கள் பயணம் மற்றும் சொகுசு வேன் வாடகை சேவைகளுக்கு ஏற்ற வகையில் 3 விதமான வீல்பேஸ் அளவுகளில், 3,350 மிமீ, 3,615 மிமீ மற்றும் 4,400 மிமீ அளவுகளில் கிடைப்பதுடன், 9+D, 10+D, 12+D, 13+D மற்றும் 16+D போன்ற பல இருக்கை அமைப்புகளில் (Seating Layouts) கிடைக்கிறது.
புதிய அர்பேனியா டீலக்ஸில் மெர்சிடிஸ் நிறுவனத்தின் தொழில்நுட்பத்தில் உருவான 2.6-லிட்டர், 4-சிலிண்டர் டர்போ டீசல் இன்ஜின் தற்போது அதிகபட்சமாக 134 hp பவரையும், 350 Nm டார்க்கையும் வெளிப்படுத்தும். முழுவதுமாக பயணிகள் மற்றும் லக்கேஜ்களுடன் பயணிக்கும் போது கூட, உடனடி பிக்கப் மற்றும் மென்மையான டிரைவிங் அனுபவத்தை இது உறுதி செய்கிறது.
வெளிப்புற தோற்றத்தில் புதிய 16-இன்ச் அலாய் வீல்கள் சேர்க்கப்பட்டுள்ளதுடன், கேபினுக்குள் நுழைய வசதியாக பவர்-ஆப்பரேட்டட் ஸ்லைடிங் ஃபுட்ஸ்டெப் வசதியும் கொடுக்கப்பட்டுள்ளது. உள்ளே பிரீமியம் லெதரெட் இருக்கைகள், அதற்கேற்ற உள்கட்டமைப்பு டிசைன் மற்றும் மரத்தாலான வுட்-ஃபினிஷ் ஃப்ளோரிங் ஆகியவை ஃபர்ஸ்ட்-கிளாஸ் விமானப் பயண அனுபவத்தை நினைவுபடுத்துகின்றன.
பயணிகளின் பொழுதுபோக்கிற்காக கூகுள் மேப்ஸ் மற்றும் ரிவர்ஸ் கேமரா வசதி கொண்ட 9-இன்ச் HD டச் ஸ்கிரீன் இன்ஃபோடெயின்மென்ட் சிஸ்டம், ஓட்டுநருக்கான TFT டிஜிட்டல் கிளஸ்டர், 8-ஸ்பீக்கர் கொண்ட டிஜிட்டல் தியேட்டர் சிஸ்டம் (DTS) மற்றும் அனைத்து வரிசை இருக்கைகளுக்கும் டைப்-A மற்றும் டைப்-C சார்ஜிங் போர்ட்கள் எனப் பல வசதிகள் நிறைந்துள்ளன.
பாதுகாப்பைப் பொறுத்தவரை, கார்களில் இருப்பது போல அனைத்து பயணிகளுக்கும் 3-பாயிண்ட் சீட் பெல்ட்கள், ஓட்டுநர் மற்றும் முன் பயணியருக்கான ஏர்பேக்குகள், நான்கு சக்கரங்களுக்கும் டிஸ்க் பிரேக்குகள், எலக்ட்ரானிக் ஸ்டெபிலிட்டி புரோகிராம் (ESP), ABS மற்றும் EBD வசதிகளுடன் என்ஜின் டிராக் டார்க் கன்ட்ரோல் (ETDC) போன்ற பாதுகாப்பு அம்சங்களும் வழங்கப்பட்டுள்ளன.
மேலும், ‘ஃபோர்ஸ் கேர்’ திட்டத்தின் மூலம் 5 ஆண்டுகள் அல்லது 5 லட்சம் கிமீ வாரண்டியும் அளிக்கப்படுவது வணிக ரீதியிலான உரிமையாளர்களுக்கு கூடுதல் நம்பிக்கையைத் தருகிறது.
